Necrologie Evert Offereins
DOODGAON
De leste tied gaot d'r veul dood. En 't bent almaol nog bekenden ok. Het is niet bij te holden. Ie hebt haost gien tied um d'r eempies bij stille te staon. Nou weer is Evert Offereins oet de tied kommen. Evert zat op de HBS in Assen in de jaoren dat ik d'r ok zat. Hij kwam van Kloosterveen en ik oet Haolen. Hij zat in B en ik in A, maor de klassen waren toen niet zo groot en wij kenden mekaar wal en kwamen mekaar regelmaotig tegen.
Aj dan van schoel bent dan ziej mekaar nooit meer. Evert was dierenarts worden en ik zat in 't underwies. Jaoren later zagen wij mekaar toch weer terug. Evert was in Bosch en Duin terecht kommen en zien kinder zaten op Het Nieuwe Lyceum in Bilthoven. En daor was ik leraar Engels en mien Erna lerares biologie. Bij zommeraovond muggen wij geern een stukkie rondfietsen en dan kwamen wij wal ies deur Bosch en Duin. Het was goed fietsen daor in de buurte. Evert had een mooi spul ter grootte van een klein landgoed met een woonhuus en een apart praktijkgebouw en ok ruumte en laand veur de peerden.
Evert was de steun en toeverlaot veur iedere peerdenbezitter. As d'r wat met je dure peerd was, dan koj twee dingen doen. Ie gungen d'r met naor de fakulteit van de universiteit op de Uithof of ie gungen naor Evert, die de reputatie had wonderen met peerden te kunnen verrichten. Hij haar de reputatie van een peerdengoeroe, een peerdenfluusteraor, die veul meer wus van peerden dan de professor en de rest van't volk daor op de Uithof.
Wij drunken dan wal ies wat saomen veur de open heerd. Evert met zien vrouw Willy en wij met zien beidend. En dan preuten wij wat over vrogger in Drenthe, over zien geliefde Ierland, of over zien kinder. Willy is niet old worden en toen ze oet de tied kwam hebt Evert en de kinder het verdriet verwarkt deur een indrukwekkende begrafenis te organiseren daor op Den en Rust in Bilthoven. Een liekkoets met vier prachtige zwarte peerden d'r veur. 't Konden ok zes peerden wezen, het is al weer jaoren leden.
In zien persoonlijke leven hef Evert smangs zwaor verlies moeten inkasseren, al waren d'r natuurlijk ok hoogtepunten. Hij haar goeie kinder en daor was 'e ok wies op. Wij waren op een prachtig feest toen Evert zien zeun Henk, nou dierenarts in Ierland, trouwde met met oes buurwichie Joanna.
Körsdaags kreeg ik nog ies een vraog van Evert over een duur schilderij dat 'e ooit ies anschaft haar. Ik belde hum op daor in Soest en uut een hoestbui klunk: 'Met Evert Offereins'. Ik zee nog zoiets onneuzels as: 'Nou Evert, nog ien nachtvörsie." Toen heurde ik van zien longkanker. Hij wus dat het niet lang meer zol duren, maor dwung bewondering of deur de manier waorop hij daor over praoten kun. Hij wol zien kinder niet belasten met het te gelde maken van 't schilderij en ik heb hum zo goed meugelijk advies geven. Ik hoopte dat 'e nog wat deur zol leven, dat 'e de reünie van oeze HBS op 4 oktober in Assen nog metmaken zol kunnen. Hij hef 't niet haald. De reünie zal wal deurgaon, maor zunder Evert Offereins.
Henk Plenter
Bij de crematie
Dankzij de fantastische medewerking van onze vrijwilligers, op wie we de laatste tijd vaak een beroep hebben moeten doen, konden wij gisteren (donderdag 2 oktober) naar de crematie in Bilthoven.
De zoon van de overledene, Henk Offereins, sprak tijdens de plechtigheid met liefde over zijn vader, maar meldde wel dat hij had uitgerekend dat Evert in zijn rokersleven ongeveer 1.400.000 sigaretten moet hebben gerookt.